Ek kry heeltyd die gevoel ek spel die plek se naam verkeerd. Ek dink ek mis 'n 'h' erens.
Gister vertrek ek vanaf Thonburi stasie in Bangkok, wat niks meer as 'n sinkdak, platvorm and kaartjie kantoor is nie, na Kanchanaburi.
'n Ouer lokomotief trek 4 eenvoudige karre die plus-minus 3 ure weswaarts vanaf Bangkok. Binne in die karre is oranje-bruin houtbanke wat rug-teen-rug gespasieer is. Die vensters word wawyd oopgelos om die lug te sirkuleer, maar dit maak nie juis 'n verskil nie, die lug buitekant is reeds so drukkend.
Erens klim 'n ouer dame (ek skat haar so sesti) op die trein en maak haarself gemaklik op die bankie oorkant myne. Sy sit reg oorkant my sodat ek my bene na links moet skuif om nie heeltyd teen haar te stamp nie. Haar naels (vingers en tone) is hot pink geverf en aan haar swart handsak om haar nek hang 'n plastiek sakkie met opgesnyde stukkies braaivleis.
Later swaai sy beide bene op haar bankie en val vas aan die slaap. Haar lig rooi lippe le effens oop en haar pienk tongetjie steek effens uit. Ek gee 'n moee sug en probeer verder lees.
Net voor 5 kom ons aan in Kanchanaburi en ek verdwaal eers oppad na my gastehuis. 'n Kamer op 'n platform wat dryf op die Kwai rivier. Te heerlik.
Na ek uitgepak het drentel ek nog so bietjie rond en besluit om aandete te neem by een van vele restaurante op Thanon Maenam Kwai (ek dink Thanon beteken straat) waar meeste eetplekke en gastehuis is.
Dit wil voorkom of die mense van Kanchanaburi die woord 'Toerisme' gehoor en met groot oordaad begin gastehuise, eetplekke en internet kafees oopmaak het. Soveel so dat daar nou meer plekke as toeriste is.
Ek is dalk ook net op verkeerde tyd van die jaar hier. 'n Agent vertel my vanoggend dat meeste van die aktiwiteite wat hier gebied word stil staan tans omdat dit buite seisoen is. Tog, dit wil voorkom of hier genoeg is om my besig te hou tot Maandag wanneer ek beplan om terug te keer na Bangkok.
No comments:
Post a Comment